بربي من غير اسم حبيت نحكي على سحتوت حسبي الله ونعم الوكيل فيه عرست جبت 3 صغار زوز بنات وطفل عمارهم عام ونص و 3 سنين و 6 سنين عايشة متهنية مع راجلي الناس حاسديني على عيشتي وعلى معاملة راجلي معايا ما تذكرش روحي نهار تغششت منه والا عاركني بالعكس بحكم هو ولد حومتي مدخل روحه مع العايلة الكل من البعيد والقريب الضحكة كانت ديما على وجهه مع الكبير والصغير اقسم بالله العظيم يلي نحكي فيه هو يلي صار مرة قاعدين نفطر و قام يجري قالي امي تو تعدات من قدامي قتله صلي على النبي امك الله يرحمها قتله انت تلقاك توحشتها جات في بالك. ورجعنا عادي اما بقات في بالي الحكاية في الليل احنا راقدين ونسمع كان في ويني وين مشات ؟ قمت نجري قتله شفما قالي كنت نشوف في رطيلة كبيرة كبر دجاجة وقتها هزيت تالفون وكلمت خوه جاء وحكيتله بعد ايامات أنا قاعدة نفطر في ولدي وهو
جاني قالي شوفي شوفي دخان اكحل داخل للبيت قتله منیش
نشوف في شيء قالي معناها انا نكذب ؟ وهز روحه وخرج من الصباح واحنا نلوجوا عليه وتعدى الليل وجاء الصباح وراجلي مفماش مشيت لخواتي وبابا يرحمه وخواته في لخر قالولنا راهو البارح شفوه قاعد في الجبانة مشينا نلقوه غادي وقال راني حليت عيني نلقى روحي بايت هوني روحنا بيه دوشناله وفي بالنا باش نهزوه طبيب قالولنا يلزم تقرو عليه شوية قرآن في الصباح قمت نهز في بنتي للكتاب نلقى سحر قدام داري وزغة ذيلها منحي وزوز عراف وقيد شاعلین و میبر كبير في خيط معقود ومحطوطين في صندوق باكو الوقيد وتحتهم لقشطة متاع يا جور قمت نعیط و فزعت الجيران دخلت نلقى راجلي دایخ هزیناه سبيطار وبعد كليينيك وفي 9 ايام توفى والطبيب قال ما عنده حتى شيء و تقلبت حياتي وليت تحت الصفر وخواته خرجوني من الدار وباعوها و انا بعت كل شيء كان عزيز عليا و تمرمدت انا وصغاري وتعذبت كل ليلة ندور بيهم في الشارع يبكوا على بوهم و امي مرضت دم وسكر وقلب وبابا مات ومماتي يلي كانت مربيتني ماتت. وفي لخر طلع سحتوت هو يلي خلالي داري ويتم ليا صغاري والمرا هذه تعاركت مع
بنتها ياخي راجلي تدخل وصارت مشكلة كبيرة بقات في قلبها
وقاتلي ألا ما نخليك تعيشي كيف البومة وحدك وتساسي و كانت
ديما تمشيله للقيروان وتبات غادي زادة وبعد جات واستعرفت قالت راني انا عملت في بالي طلاق مش موت و قالت سحتوت هو يلي عملت عنده ومشيتله باش ينحيه قالت تطردني وقالي يلزم تزيدي الدوبل
وتو راجلي عنده 15 عام متوفي وباقي سحر سحتوت يتبع فيا وفي صغاري